Զինվորին ծեծի ենթարկելու փաստով քրեական գործ է հարուցվել

Օրեր առաջ Լեռնային Ղարաբաղից Երևանի զինվորական հոսպիտալ տեղափոխված 18-ամյա զինվորի վիճակը շարունակում է մնալ ծանր կայուն։

Կենտրոնական կլինիկական զինվորական հոսպիտալի պետ Արամ Ասատուրյանն «Ազատությանը» փոխանցեց, որ Մհեր Խլղաթյանի հիմնական խնդիրը երկկողմանի թոքաբորբն է, ինչի դեմ իրենք միջոցներ են ձեռնարկում։ Բժիշկը նաև հավելեց, թե զինվորը մեկ օր առաջ հոսպիտալ է ընդունվել մթագնած գիտակցությամբ, ինչը սակայն անցել է, գիտակցությունն արդեն տեղն է։

Երիտասարդը 25 օր առաջ է զորակոչվել բանակ ու զինվորական երդում դեռ չի էլ հասցրել տալ։ Մայրը՝ Գոհար Շահնազարյանն, արցունքն աչքերին պատմում էր, որ առողջ որդի է ճանապարհել բանակ, բայց մի քանի օր առաջ Մհերի հորեղբոր որդու օգնությամբ Վարդենիսից Երևան հասցված զինվորին հարազատները հազիվ են ճանաչել։ Մայրն ասում է, որ որդին Երևան է հասցվել մերկ՝ առանց հագուստի, ընդամենը ծածկոցով փաթաթված։

«Ծեծել էին, գլխին խփած էր, թոքաբորբ, մի թոքը՝ ջրի մեջ, էն մյուսը՝ կեսն է ջրի մեջ։ Ահավոր վիճակ… կարելի է ասել՝ մեռած բերին, հասցրեցին։ Ձեռքը վառել էին։ Ես էդքան հագուստ եմ ուղարկել, էրեխեն տկլոր, մի հատ նասկի էրեխուս վրա չկար»,- ասաց մայրը։

Դեպքի առթիվ պաշտպանության նախարարության քննչական ծառայությունում քրեական գործ է հարուցվել։ Քննչական ծառայության ավագ սպա Մերի Սարգսյանն «Ազատությանը» փոխանցեց, որ հունվարի 12-ի լույս 13-ի գիշերը զինվորը Վարդենիսից տեղափոխվել է Երևան։ Բացի երկկողմանի թոքաբորբից զինվորն ունի տարբեր մարմնական վնասվածքներ։

Քրեական գործը հարուցվել է երկու հոդվածով. մեկը զինվորական ծառայության պարտականությունները կատարելու կապակցությամբ ստորադասին ծեծելու կամ նրա նկատմամբ այլ բռնություն գործադրելու համար, մյուսը՝ ծառայության նկատմամբ պետի կամ պաշտոնատար անձի անփույթ վերաբերմունքի համար, եթե անզգուշությամբ առաջացրել են ծանր հետևանքներ։ Նշանակվել է դատաբժշկական փորձաքննություն, նախաքննությունը շարունակվում է։ Ըստ մեր տեղեկությունների, վաղը հավանաբար ձերբակալություններ կլինեն։

Օրեր առաջ զինվորի ընտանիքը հեռախոսազրույց է ունեցել զորամասի բուժկետի բժշկի հետ, ով հայտարարել է, թե նրանց տղան հիվանդ է ձևանում։ Ծեծի պատճառը, ըստ հարազատների, դա է եղել։

«Երկու րոպե հետո զանգում եմ, մի կերպ էր էրեխեն խոսում՝ տնքալով»,- պատմեց մայրը։

Արման անունով ներկայացած բժիշկը մորը փոխանցել է, թե որդին հոգեկան  շեղումներ ունի.- «Մի ժամ, երկու ժամ… նորից զանգում եմ, բժիշկն է պատասխանում, ասում է՝ «սուտ է անում, դուք հանգիստ եղեք, գժի տեղ է իրեն դրել, բայց մի բան լավ իմացեք, եթե իրեն տարան, հոգեբուժարան ստուգել, որ ձևացնում է, ինքը մեծ խնդիրներ կունենա»։ Բայց ինչո՞ւ պետք է իմ էրեխեն հոգեկան բաներ անի, քանի որ ինքը առողջ գնացել է, եթե հոգեկան է, ինչո՞ւ են տանում բանակ»։

www.youtube.com/watch?v=MypTp_lXddk

Ամբողջական հոդվածը կարող եք կարդալ այս հասցեով՝ www.azatutyun.am

  • 0

  • Տվյալների բազա



  • Գրանցել միջադեպ

    Ձեր կամ Ձեր հարազատի նկատմամբ ՀՀ ԶՈւ-ում տեղի ունեցած իրավախախտում Ավելացնել
    1994թ.-ից հետո ՀՀ ԶՈւ-ում տեղի ունեցած մահվան ելքով միջադեպ Ավելացնել
  • Մահվան դեպքերն ըստ վայրերի

    © 2013-2024 Կայքը պատրաստվել է «Ապահով զինվորներ՝ անվտանգ Հայաստանին» ծրագրի շրջանակներում:
    «Ապահով զինվորներ՝ անվտանգ Հայաստանին» ծրագիրն իրականացվում է PAX նիդերլանդական կազմակերպության աջակցությամբ:
    Կայքի գլխագրում տեղ գտած լուսանկարը` Արմեն Երամիշյան / www.hetq.am
    Միջադեպի ամսաթիվը