2021թ. առաջին կիսամյակում ՀՀ և ԱՀ զինված ուժերում գրանցված մահվան դեպքերի վիճակագրություն
2021թ. առաջին վեց ամիսների ընթացքում «Խաղաղության երկխոսություն» հասարակական կազմակերպությանը տեղեկություններ են հայտնի դարձել ՀՀ և ԱՀ զինված ուժերում գրանցված 25 մահվան դեպքի վերաբերյալ:
Նշված ժամանակահատվածում հրադադարի ռեժիմի խախտման հետևանքով զոհվել է 1 զինծառայող։ Գրանցվել է չորս ինքնասպանության դեպք: Դժբախտ պատահարների զոհ է դարձել 11 զինծառայող: Առողջական խնդիրներից մահացել է 8 զինծառայող: Անվտանգության կանոնների խախտման հետևանքով գրանցվել է մահվան մեկ դեպք:
Ըստ Հայաստանի Հանրապետության դատախազության տրամադրած տեղեկատվության՝ 2021թ.-ի հունվարի 1-ից հունիսի 30-ն ընկած ժամանակահատվածում ՀՀ և ԱՀ զինված ուժերում արձանագրված ժամկետային և պայմանագրային զինծառայողների մահվան 25 դեպքերից 11-ը զինվորական ծառայության հետ կապված չէ:
* Սույն տեղեկագրում գրանցված դեպքերից մեկը հրապարակվել է ԱՀ ՊՆ-ի կողմից, որը, սակայն, տեղ չի գտել դատախազության տրամադրած տեղեկագրում։ Դեպքերից երկուսում էլ դատախազությունը և ՀՀ ՊՆ-ն զինվորի ազգանվան տարբեր տարբերակներ են նշում։
Ստորև ներկայացնում ենք 2021թ.-ի առաջին կիսամյակում գրանցված մահվան դեպքերի թվերն՝ ըստ պատճառների։
2021թ. գրանցված մահվան դեպքերն ըստ պատճառների
Գրանցված 25 միջադեպից 19-ը տեղի է ունեցել ՀՀ, վեցը՝ ԱՀ զինված ուժերում։
Մահվան դեպքի գրանցման վայրը
Գրանցված դեպքերից 13-ի համար տեղեկատվության առաջնային աղբյուրը ՀՀ ՊՆ-ն կամ ԱՀ ՊՆ-ն չեն եղել։
Մահվան դեպքերի վերաբերյալ տարածված տեղեկատվության առաջնային աղբյուրը
2018, 2019, 2020 և 2021թթ․ առաջին կիսամյակում ՀՀ և ԱՀ զինված ուժերում մահվան դեպքերի թվերի համեմատությունից պարզ է դառնում, որ այս տարի գրանցված մահվան դեպքերի թիվը համեմատաբար նվազել է. 2018թ.-ի նույն ժամանակահատվածում գրանցվել է 33 մահվան դեպք, 2019 թ.-ին` 30, 2020թ.-ին 33 դեպք։
2018, 2019, 2020 և 2021թթ. առաջին կիսամյակներում ՀՀ և ԱՀ զինված ուժերում մահվան դեպքերի թվերի համեմատությունը
2021թ․ առաջին կիսամյակում ՀՀ եւ ԱՀ զինված ուժերում գրանցված մահվան դեպքերի վերաբերյալ մանրամասները ներկայացված են նյութին կցված փաստաթղթում: (Microsoft Excel File, 51 Kb):
Ավելացվել է 22 July, 2021
